O pasado luns 28 de outubro, o noso alumnado de 3º da ESO e de Tecnoloxía Industrial de 1º e 2º de Bacharelato, acompañados polos profesores José M. Tallos e Rebeca Gómez, visitaron as instalacións do Parque Eólico Experimental de Sotavento. 

Na visita, organizada polo Departamento de Tecnoloxía, os alumnos e alumnas asistiron a unha charla onde puideron coñecer as formas tradicionais de aproveitar a enerxía e a súa evolución ao longo da historia. 

Tamén fixeron un percorrido guiado por unha vivenda bioclimática demostrativa onde puideron comprender a importancia da arquitectura bioclimática no aforro enerxético e na mellora da nosa calidade de vida. 

Finalmente puideron coñecer os avances tecnolóxicos que teñen lugar no terreo da produción de enerxía renovable a través da observación directa do funcionamento dos aeroxeradores no taller de enerxía e visitando un aeroxerador in situ. 

A visita ao parque permitiu que os nosos alumnos e alumnas tiveran a posibilidade de adquirir unha maior sensibilidade e conciencia do esgotamento de recursos enerxéticos e a necesidade dun uso responsable da enerxía na súa vida diaria.

Grazas ao equipo de educadores do parque de Sotavento por levar a cabo unha visita que fomentou a aprendizaxe significativa dos alumnos e alumnas e á vicedirectora do noso centro, María Álvarez, pola súa axuda na organización da actividade.

O Departamento de Tecnoloxía